車仔強勢拆“紐”

曼聯輕取韋斯咸後，可以話衛冕聯賽冠軍在望，因為煞科戰對住費爵爺的“門徒”布魯士所帶領的韋根，係唔係尊師重道就唔知，但肯定“阿布”絕對唔係一個忘恩負義的人，所以球隊在大踢風流波的情況下，預料打硬一張“人情牌”。

車仔領隊格蘭特其實都心中有數，奪標機會得個“諗”字，但英超球會一向都係講鬥志及決心，未戰到最後一刻，仍有機會的話都絕不放棄，相信車仔一班球員都係一樣，繼續會踢出近期氣勢及風格，希望帶住強勁走勢向歐冠進發，今晚作客紐卡素必定會全力搏殺，布歷克、杜奧巴、艾辛及林伯特等近期大打爭氣波，而且發揮出良好狀態及強勁戰意，所以即使今晚作客要讓到一球，都要捧場。

紐卡素近七場保持不敗，取得四勝三和戰績，似乎有點回勇跡象，但其實七場對手之中，有五隊都係在下游榜尾掙扎球隊，以紐卡素本身實力，贏唔到都抵打，話晒中前場的奧雲、馬田斯、巴頓及維杜卡都係有級數人馬，對住弱隊點都交到貨，但後防超弱係衆所皆知，對住車仔強大鋒力確係有排擔心。

推介：車路士 2：0