史浩克殺“波”

德甲聯賽冠軍已經成為拜仁的囊中物，至於第二名之爭，睇怕都要打埋最後三輪比賽先知，排第三位的史浩克當然希望作出最後衝刺，能夠超越雲達不萊梅成為亞軍，兼且唔使踢歐冠外圍賽，更要保住三甲席位，避免漢堡爬頭連外圍賽都冇份，從賽程編排所睇，史浩克絕對有機會可以從後趕上，今晚先對波琴，最後兩關只係法蘭克福及尾二的紐倫堡，只要發揮正常應可攞足九分，相反，還要作客漢堡與利華古遜，及主場對漢諾威和雲達不萊梅，隨時都有失分可能，所以史浩克必搏呢三場比賽。

史浩克今晚先要過第一關對波琴，以球隊實力及近況，呢三分應該問題不大，之前五比○大炒科特布斯及一球擊敗漢堡，球員都能夠發揮應有水準，雖然上仗只能與漢諾威打成平手，但全場佔盡七成攻勢，十五次射門七中目標，贏唔到亦冇話可說，但證明球員狀態及發揮依然可以信賴，只要今仗繼續向對手搶攻施壓，贏波機會極高。波琴一早已脫離降班威脅，而近兩場表現亦明顯欠缺比賽鬥心，兩隊戰意相比，史浩克絕對贏晒。

推介：史浩克 2：1