|
一心諗住爭今季德甲亞軍史浩克04，上周末主場竟然畀漢諾威賽和失分，唔單止亞軍位置畀不來梅搶埋，要確定保住前三名下季踢歐聯都有暗湧，剩番三周聯賽更加唔可以再有閃失，好彩今輪周中快車對手只係風流隊伍波琴，一於睇好史浩克補中開客勝！（有線61周三凌晨2:00直播）
主隊波琴依家排中游第十一位，同第十六位降班區紐倫堡足足相距九分，換言之已經肯定護級成功，球員開始有放暑假心態可以理解，尤其今輪踢周中快車等於開OT，想佢畀心機踢都難啦！上周末作客護級隊伍比勒費爾德，波琴已經好合作咁擺低三分畀對方救命，今輪對住同樣等分開飯史浩克，有理由相信佢會「一視同仁」。
波琴風流波往績又輸晒
更何況，波琴今場唔單止個龍門拉斯杜夫卡有傷，中場件加拿大仔恩賀夫仲練波陣撼親個頭，額骨有裂痕，要醫院攤抖，陣容肯定冇對手咁完整。
史浩克上周末對漢諾威意外先失一球，雖然完半場已經可以追回平手，但可惜攻足成個下半場都拎唔到贏波入球，不過失分之後球隊都只係落後第二位不來梅兩分，要爭亞軍直接入歐聯分組賽圈仍然有機會，以史浩克近六次對波琴有五勝一負壓倒性往績，加上贏波決心，要繼首循環之後再贏多次波琴，無問題！ 友情提示：直接搜索“901”可以快速找到本站，查看更多精彩足球分析。
|
