聽朝清晨開始南美自由盃會進行三場十六強次回合賽事，當中朱楓最睇好富明尼斯！事關佢有「巴西車路士」之稱，主場特佳，對住有正選門將奧斯賓拿停賽國民體育會，贏多鋪話咁易啦！（開賽時間：周三清晨5:30）
國民會作客差
首回合富明尼斯作客以二比一擊敗自哥倫比亞國民體育會，對手仲有正選門將奧斯賓拿領紅今場要停賽，聽朝富明尼斯就算和波亦可出線，何解朱楓仲對主W咁有信心呢？原因好簡單，事關富明尼斯近年大事擴軍，好似今季初就從浦和紅鑽買入射手華盛頓，被當地傳媒譽為「巴西車路士」。事實上，佢今屆自由盃分組賽表現亦同車仔好相似，就係主場威力勁到無倫，三戰全勝喪入九球未失一球。
國民體育會係十六強中分組賽成績最曳球隊，當中作客更只得一勝兩負。十六強首回合有主場都輸波，今鋪作客仲要冇埋正選門將奧斯賓拿，隨時輸鑊甘！