馬體會求“愛”冇咁易

今晚有場西甲獨腳戲，由愛斯賓奴對馬德里體育會，愛斯賓奴現時唯一要爭的只係圖圖盃參賽資格，基本上球會重視程度不大，而且近期狀態比較低沉，近七場比賽只係三和四負，上仗亦只係在完場前迫和包尾已篤定降班的利雲特。

根據賽後報告，愛斯賓奴整場表現雜亂無章，防守鬆散，進攻欠缺組織性，完全踢唔出應有隊形，證明呢支無欲無求的中游分子，經已欠缺鬥志及爭勝決心。不過，球隊主場發揮比較穩定，加上自己地頭都唔想輸波咁冇面。至於講到實力，主隊與今仗對手馬體會亦並非相差太遠，所以贏唔到都未必輸，只要加多兩錢肉緊，至少坐和望贏。

馬體會目前排第四位，多第五位的山坦德兩分，隨時都會失去下季歐冠盃參賽資格，餘下三場比賽的確要步步為營，事關最後兩場對手係拉科及華倫西亞，兩隊同樣屬於實力分子，要贏唔係話咁易，最重要今仗先要搶足三分。其實馬體會狀態算係平平穩穩，贏過輸過又和過，季初至今冇乜大起大跌，上周大勝維爾瓦三球，可加強比賽信心，睇兩隊都係難分勝負。

推介：和波 2：2