不萊梅要攞“威”

在人少打人多的情況下，雲達不萊梅仍然能夠將實力不俗的漢堡打敗，如此頑強拼勁，呢個亞軍，不萊梅確係志在必得，今晚主場出戰，只要將對手漢諾威擊敗，就可以成為今季聯賽“阿二”，以近期大勇狀態的確值得信賴。排第八位的漢諾威對勝負已經無關重要，只係踢多兩場等收咧，積極性與進取心肯定不足，初盤不萊梅讓一球／球半，捧硬主隊必勝無疑。

不萊梅一向入球都有極佳保證，十八隊德甲當中邊隊夠佢威，迪亞高、洛辛堡及艾美達組成的攻擊鐵三角，殺傷力驚人，各人都有雙位入球數字，真係睇少一個都唔掂，球隊近期表現非常穩定，顯示出仍係德國勁旅之一，從對漢堡一仗所見，球員爭“亞”決心相當明顯，一向踢開全攻型的不萊梅，必定向對手施壓，誓要全取三分穩奪亞軍席位，今晚主場唔贏，下場作客就比較難打，所以非勝不可。曾經在首循環與不萊梅合演一場精彩入球大戰，最後更加殺退對手，漢諾威本身實力唔差得去邊，但時至今日，戰意及鬥心經已鬆懈，對不萊梅已冇任何阻力。

推介：雲達不萊梅 2：0