柏雷素爾中場茂原岳人上月首度入選國家隊，正當逐步攀上事業高峰之時，佢突然被當地警方拘捕，因涉於○一年潛入女大學偷竊內衣，當堂人氣大跌。
茂原岳人自毀前程
日本球圈重視球員品行，年前磐田山葉新星菊地直哉涉嫌與未成年少女「車震」，結果被球會放逐，輾轉間流落德乙力卡爾斯耶拿。今次茂原斷正，下場同前者一樣，好彩可於他鄉落班，但國家隊大門恐怕唔會再為佢打開。
茂原暫時人間蒸發，地球依然在轉，柏雷素爾對上兩場贏晒，但對手只屬魚腩千葉市原及搏到殘神戶勝利船，不能作準！FC東京剛被打破主場不敗身，躁爆下於主場再度出擊鬥柏雷素爾，值得捧場！