聯賽次席車路士與曼聯同分，表面上仍然有爭標機會，但由於兩隊得失球差距太遠，車仔實際上係落後零點五分，球隊上下已有爭標失敗心理準備，冇晒壓力對今場發揮有正面幫助。車仔今仗目標好明確，就係要贏波向球迷交代，然後將命運交到上帝手上，主Ｗ及「半場勝」捧得過。（now 631周日晚10時直播）
為歐聯決賽造靚勢
車路士打入歐聯決賽，聯賽踢到最後一輪都仲有得爭，好多人開始轉口風，之前被彈到一文不值領隊格蘭，竟然贏到唔少掌聲。但樂比仔唔會改變對格蘭睇法，佢唯一好處就係個人冇乜主見，除老闆話乜就乜，減少無謂爭執之外，佢接手後隊波亦冇大執，令球隊毫無戰術風格可言，呢招以不變應萬變，無招勝有招，其實好適合車仔，因為車仔厲害之處係球員質素，既然一早已搵到最佳陣式，格蘭索性乜都唔變，食老本係最聰明做法。
其實車路士早已將目標放歐聯，不過歐聯決賽未有耐至舉行，根本冇需要留力，車路士更希望大勝一場振奮士氣，現時隊中冇傷兵，主力如波歷克、林柏特、艾辛及杜奧巴都當弗，以兩隊實力差距，加上車路士主場八十一場不敗佳績，要贏波真係毫無難度。由於今場戰局可能受到另一場曼聯比數而影響，若曼聯一早拋離，車仔贏波亦爭標無望，建議捧車仔「半場勝」穩陣過「讓球勝」。
保頓早已無心戀戰
另一邊廂保頓基本上已護級成功，除非伯明翰贏波，雷丁大炒打比郡，保頓先有機會降班，故球隊已一早開定派對，據聞仲玩成個星期添，加上主將迪奧夫亦已鐵定離隊，如此狀況，實在難以壞車仔大事。
雙雄奪標可能性
曼 聯84分 得失球差：+56
車路士84分 得失球差：+39
賽果 冠軍
曼聯勝、車路士勝 雙方同分計算得失球差
曼聯勝、車路士和或負 曼聯
曼聯和或負、車路士勝 車路士
曼聯和、車路士和或負 曼聯
曼聯負、車路士負 雙方同分計算得失球差