炒股梗係揀能夠配合時勢概念股，好似早排「奧運概念股」同「三通概念股」，就升到聲。揀波落注亦係同一道理，臨近收咧，當然要吼實爭標同護級球隊，One Sir今次推介「護級概念股」維爾瓦，佢目前僅以較佳對賽往績壓住奧沙辛拿，企降班線之上，今晚作客風流分子艾美利亞，必定搏命搶分向上爬，平手盤維爾瓦值博。（周一凌晨3時開賽）
西甲冠軍已塵埃落定，榜尾三個降班席位，利雲特同梅西亞佔其二，依家睇邊一隊會陪佢降班。當中排尾四維爾瓦，以及尾三奧沙辛拿，自然係高危分子，兩隊目前同分，維爾瓦唯一優勢係今季兩勝奧沙辛拿，對賽往績佔優，若然兩隊最後仍然係以目前排名及同分過終點，維爾瓦就可保住甲組位置，維爾瓦為前途同錢途，點都會拚埋條老命，力爭贏晒餘下兩場。
雖然維爾瓦近期戰績麻麻，不過大家要留意佢近兩場對手係亞軍維拉利爾同第四位馬體會，輸波並唔出奇，但面對實力接近奧沙辛拿、梅西亞同利雲特，都可以贏波，甚至逼和巴塞隆拿，絕對不能小覷。
艾美利亞做順水人情
事實上，今季新升班艾美利亞已經超額完成任務，長期位處中游，佢亦似乎已收夠籌，近大半月水準跌晒Watt，包括輸畀另一支護級分子華拉度列，上仗領先基達菲兩球，都可以輸番轉頭，證明佢已唔志在分數，今場隨時做個順水人情畀維爾瓦。