和仔今季同大家一齊緊隨英超大勢，無可否認全季演出最搶鏡球隊就係曼聯，由「紅魔」冕英超，相信大家都會心服口服。曼聯依家仲差最後一步，作客韋根贏波就即刻捧盃，點會願見臨尾香？捧曼聯「讓球客勝」完美煞科！（now632台周日晚10:00直播）
睇住曼聯季初三場不勝，到之後三十四場聯賽贏二十六場，歐聯亦都過關斬將殺入決賽，依家成季最後兩場波就決定兩個錦標，球員心態上再堅定不過。雖話曼聯同車路士同分，但得失球差優勢令曼聯只要贏波就99.9%封王，既然戰意同決心都冇問題，講實力就更加唔需要為佢擔心，「紅魔」今季十七次面對積分榜尾九位球隊贏足十四場，絕對夠正氣。
朗尼後備拿尼停賽
陣容方面，朗尼傷愈但只列後備，葡萄牙翼鋒拿尼就要停賽，幸C朗、朴智星、泰維斯等人狀態高昂下，對戰鬥力影響唔大。今場對C朗講仲有一個目標，上場梅開二度後佢今季總共幫曼聯入四十球，仲有兩場時間畀佢挑戰雲尼斯達萊（44球）、丹尼士羅（46球）紀錄，以C朗季尾狀態，和仔就好有信心佢今場可入波！對家韋根上岸後打緊風流波，雖然和仔相信佢放水機會唔大，但礙於本身實力有限，難做攔路虎，捧曼聯大勝捧盃寫上Happy Ending！
布魯士對費Sir好識做
英超煞科戰揭曉誰是冠軍，曼聯強勢狙擊韋根勝利在望，兩個降班名額將富咸、雷丁同伯明翰之間產生，其中富咸護級希望較大。
曼聯作客韋根係「大曼徹斯特地區打戰」，能贏波兼捧盃真係威過「威士忌」。想贏波當然要靠落場球員，但領隊呢場扮演住更重要角色，費爺爵同布魯士分屬兩師徒，後者球員高峰時代就曼聯度過，做過紅魔隊長，仲替曼聯上陣超過四百場攻入五十一球！
當然費爺爵亦好清楚佢有幾多料，而為報答知遇之恩，轉做伯明翰領隊後布魯士，每次對曼聯都好識做，英超對賽八次一和七負，今次帶領韋根難扭轉宿命。
近六次對曼聯全敗韋根，最令人擔心係條「騎呢防線」，轉身慢幾拍巴布爾點頂得住紅魔狂攻，仲有今季正式由利物浦「買斷」門將卻克蘭（右圖）雖然有高大身材，但時不時犯「蝦碌式」低級錯誤，只望輸少當贏。
富咸有貴人相助
至於護級漩渦掙扎緊雷丁、富咸同伯明翰，究竟邊兩隊會降班呢？之前都講過睇番近幾輪形勢，有貴人相助富咸，對曼城都可以反敗為勝，而樸茨茅夫更有大條道理留力足總盃決賽，富咸作客贏波唔出奇，護級大功告成！