開季之前，如果叫大家講對薩拉戈薩、皇馬今季展望，相信大部分人都會話皇馬可以贏冠軍，而薩拉戈薩就至少可以爭到個歐協盃席位。結果皇馬就真係捧盃！但係又有邊個會估到，薩拉戈薩呢支球星如雲隊伍，竟然會深陷降班危機呢？既然皇馬依家已經冇爭分必要，怕且薩拉戈薩都會爭氣贏波？一於捧上盤！（有線61及廣東體育周一凌晨3:00直播）
本來薩拉戈薩今季組軍，真係令人寄予厚望！射手迪亞高米列圖、「小丑」艾馬、「大頭仔」迪亞歷辛度幾位國腳級阿根廷兵當然係骨幹啦，再加埋馬度沙林以備受吹捧姿態加盟，莫講話要爭前六，甚至講佢可以入前四亦一都唔誇張。可惜，唔使幾耐，先有馬度沙林受重創，再有艾馬、迪亞歷辛度內訌，成隊波士氣冇晒，練亦搞唔掂，淨係主帥都足足換四個。
護級心切季尾爭氣
到最近兩個月，薩拉戈薩終於甦醒喇！對上五場聯賽取得兩勝兩和一負，淨係周中對住華倫呢場護級大戰至僅輸○比一。依家球隊只距離降班區一分，今場仲要面對新鮮出爐冠軍皇馬，點知初盤開出，竟然係薩拉戈薩讓皇馬平半！咁唔多唔少反映，皇馬唔會阻人發達。事實上，翻查往績，薩拉戈薩近三次主場對皇馬非贏即和，所以今場無論金錢同精神上，我都支持主隊！