歐洲盃D組形勢

除死亡C組外，D組亦係“魔鬼之旅”，上屆冠軍希臘，機動部隊俄羅斯，被譽為世界最高水平聯賽的西班牙，仲有實而不華的瑞典，四隊都有出線能力，相信呢組會踢到天昏地暗。

西班牙係我首選，因為當起球星唔少，費比加斯、沙比艾朗素、托里斯、大衛維拉及利耶斯等，聽到呢幾位煞食球星，睇怕對手都聞風喪膽，如果西班牙入唔到八強，精彩程度肯定大減，事關西班牙係本人今屆奪標心水之一，最好能夠打入決賽。希臘貴為上屆冠軍，實力當然有番咁上下，而近呢兩三年亦能保持一定水準，球隊新星輩出，講經驗講實力，希臘一點唔輸蝕。

瑞典踢法一向畀人感覺都係實而不華，只可惜球隊過份重於體能方面，戰術上部署以及陣式打法都較為缺乏，類似英式高“Q”大棍的踢法，似乎功效不大。俄羅斯應該係實力較弱一隊，要過三關突圍而出確有一定難度。

其實呢組出線形勢相當緊湊，好可能賽程會影響大局，希臘與瑞典在第一輪碰頭，輸波一隊可能“係咁先”，而希臘最後一場對西班牙亦係關鍵一仗。