樸夫攻“城”有計

英格蘭足總盃今晚上演決賽，由樸茨茅夫對卡迪夫城，戲碼雖然弱些少，不過英國球隊一向都係戰鬥心強，拼勁十足，未戰到最後都永不言敗，所以今仗仍係一場快上快落的精彩對決，初盤樸茨茅夫需要讓半球 / 一球，相當正路，始終英超球會對次一級的英冠球隊，無論人腳、實力、體能、技術及球員比賽心理質素等都絕對佔優，亦好明顯有高低之分，相信樸茨茅夫可以順利捧盃。

自從穩坐聯賽七八位之後，樸茨茅夫餘下比賽經已大踢“交差波”，根本擺到明將全部精力集中於今晚一戰，所以季尾多場比賽大部分主力輪住休戰，而最後四場全輸亦不足為奇。老樸近日備戰積極，操練亦以進攻為主，希望今仗可以在九十分鐘內解決對手，強攻猛打下必有斬獲，捧硬志在必得的樸茨茅夫。

在英冠排第十二位的卡迪夫城，陣中亦擁有多名球星坐陣，包括夏索賓基、科拿及冼佳亞，不過都已經“過晒氣”，而部分主力球員亦都年過三十，要與樸茨茅夫一班精力充沛的非洲球員鬥攻鬥搶，捱到八十分鐘當你贏。

推介：樸茨茅夫 2：0