|
今晚西甲煞科日，最受注目當然係邊支球隊要陪利雲特及梅西亞降班。現時未能安枕仲有華拉度列、維爾瓦、奧沙辛拿及薩拉戈薩，表面上最低分薩拉戈薩形勢最差，但由於維爾瓦與華拉度列碰頭，換言之只要薩軍自己爭氣，今晚作客擊敗馬略卡就肯定護級成功，嘉輝決定揀受讓平半薩軍。（有線足球台61周一凌晨零時直播）
因為冠、亞軍及歐聯外圍賽席位都已塵埃落定，除護級之外，仲有爭就剩番一個歐洲足協盃資格，分別由桑坦德及馬略卡爭奪。適逢兩軍煞科戰都要面對護級分子，所以兩場比賽肯定打甩髀，不過嘉輝兩場波都會企護級分子邊。先講馬略卡對薩拉戈薩，客隊近幾場都頗有運仔，對拉科魯尼亞完場前一刻入波三分，上場則驚濤駭浪逼和皇家馬德里，令護級形勢不致太壞，直覺上對薩軍護級成功係略有「信念」。
當然除信念之外，嘉輝亦覺得護級大過天，鬥志一定比爭足協盃資格更旺盛。最佳例子當然係今季英超煞科日，要爭分護級伯明翰、雷丁及富咸統統贏波，反映出護級分子唔見棺材唔流眼淚，面對臨香一刻通常可以爆發出潛在「小宇宙」，打高幾班波。再者，薩拉戈薩班底根本唔差，同馬略卡係半斤八，所以今場受讓絕對捧得過，博好分頭更可取客Ｗ。
桑坦德讓奧沙車馬炮
另一場關鍵戰桑坦德主場對奧沙辛拿，嘉輝揀波大致上與馬、薩一戰相似，都係覺得護級鬥志較高，客隊受讓抵捧。此外，桑坦德今場有賓尼路斯及梅里迪斯停賽，而中堅加雷亦因傷提早收咧，三大主力同時缺陣下，可以話益晒奧沙辛拿，所以嘉輝對佢最後能護級成功都幾有信心。
馬略卡練揚言唔放水
今晚馬略卡主場出戰薩拉戈薩，練文沙奴賽前向其他護級球隊大派定心丸，話佢唔會放水，一定盡全力擊敗薩拉戈薩。其實文沙奴都唔係黑心，因為佢自己一直有個夢想，就係要帶領馬略卡重返歐洲賽場喎！ 友情提示：直接搜索“901”可以快速找到本站，查看更多精彩足球分析。
|
