國足突圍未可樂觀

中國國家隊又一次在世界盃外圍賽小組賽上打和，已經三連和的中國隊能否在小組出線？真係無乜把握。

睇返中國隊對卡塔爾的客場之戰真係一額汗，其實點止最後畀條門柱救番一命，成場比賽中國隊唔輸真係幾好彩。前三場大戰本來機會唔差，但中國隊終於亦只得三分，包括失掉十二碼贏波良機。

雖然情感上一定會支持中國隊，但從實情講，國家隊真係無乜幾多值得稱讚的地方，該贏唔贏，如果變成唔該輸又輸，即係四年等候又竹籃打水，諗起都唔開心。希望國家隊返回主場作賽有更好的表現啦，不過另一樣擔心即時湧現，在主場比賽，中國隊表現更差的紀錄又何止一次，今次唔好重蹈覆轍呀，阿門！

抛開感情用事，中國隊小組出線機會自然依然唔小，但係亦無理由比較樂觀，因為近年嚟在一啲預計唔到的重要比賽中都會失利真係時有發生，又點怪得我哋心虛先？須知道對於一支球隊、一名球員，四年一屆的世界盃係幾難得嘅機會？有幾多球星一屆世界盃無踢好，根本連“報仇”的機會都唔會再有。而一名球員一世仔又可以踢幾次世界盃？爭氣啦中國隊，踢番幾場好波畀中國球迷睇下得唔得？四川大地震後國人真係好需要開心一下，拜託。