世界盃亞洲區第三圈分組賽，中國隊經過三輪賽事同對手全部和氣收場後，依家澳洲同卡塔爾之後排第三，今日返回天津主場對住出線最大勁敵卡塔爾，呢場絕對係打入最後十強關鍵一戰。唔使問阿貴，阿占撐硬國家隊打開勝利之門！（有線61、中央5台及廣東體育周六晚8:00直播）
咪以為阿占支持國家隊純粹因為民族意識盲目追捧，有實際根據！首先計對賽，國足唔單止唔輸蝕，反而仲有幾明顯優勢添：最近六次同卡塔爾交手，到三勝三和佳績，包括對上兩次主場都奏凱，心理上有一定優勢。再講國家隊防守近排都有穩定演出，最近兩仗都保住唔失波，所以只要今場維持水準，已經封住蝕本門肯定唔使輸先，之後就可以再諗計靠中前場入波爭勝。
卡塔爾兩場客戰失3球
講到進攻，就唔可以唔提上個禮拜作客卡塔爾場，當時國家隊排個四五一陣式，前面齋踢韓鵬一個，全場踢都拉成均勢，特別係上半場前中段，仲畀到唔少壓力卡塔爾添！估計今日返到主場，形勢所逼下，中前場仲可以進取些少，前線派夾慣夾熟曲波同韓鵬攻堅，再加埋英格蘭浸過鹹水返鄭智組成進攻鐵三角，鋒力唔使懷疑。
況且呢場波中國的確係非勝不可，如果唔晒三分，真係隨時會提早出局，鬥心就肯定唔使懷疑！最重要係有主場中國球迷打氣團，集合天時地利同人和，要攻陷近兩場作客連失三球卡塔爾，難度唔算高！
頂『占』筍盤
中國 （主勝）