死亡C組首輪分組賽上演，羅馬尼亞於瑞士蘇黎世鬥法國，法國守強攻弱，而且表現慢熱，以領隊杜明歷保守性格，就算贏波都難望大勝，入球「細」係投注首選。如果嫌賠率低可捧「半場和」，此組實力接近，首度亮相當然唔想開壞頭，雙方半場打和機會高。（now 632周二凌晨零時直播）
羅馬尼亞被視為此組實力較弱一隊，法國領隊杜明歷話明今場目標係全取三分，否則往後兩場分組賽對荷蘭及意大利會更加難打，雖然佢把口咁講，不過從近期熱身賽所見，法國贏哥倫比亞同英格蘭都係小勝一球，擊敗厄瓜多爾全憑新丁巴菲迪比高美斯神來之筆，對巴拉圭更加咬極唔入，以往一直為人詬病攻力問題未見太大改善，相反值得留意係佢近四場熱身賽都冇失波，雖然隊長韋拉有傷料缺陣，但相信對防線影響不大。
大賽例牌慢熱
法國上場主場對哥倫比亞只係一場熱身賽，但當取得一球領先之後，球隊竟然大打防守足球，充分反映杜明歷保守性格。睇番杜明歷○六年帶隊參加世界盃決賽周，法國三場分組賽全開細，頭兩場分別和波，表現慢熱，就算大家睇好法國贏波，亦唔好寄望可以贏得好精彩。
羅馬尼亞自○○年歐國盃後，已經闊別大賽決賽周八年，球員為表現自己，拚搏決心唔使懷疑，而且佢抵達集訓大本營後多作閉門練習，禁止傳媒採訪，準備工夫做到足，實力成謎不宜過分低估。可惜講到大賽經驗始終唔及身經百戰法國，而且進攻太倚賴梅度，面對法國一條鋼鐵防線要破關唔容易，綜合以上分析，波童認為今場開細機會極高。
穩陣波捧半和
如果嫌目前入球細賠率僅得1.48倍太低，可捧1.9倍「半場和」，事關呢組四隊實力太接近，每場勝負對出線都好關鍵，既然今場係首場分組賽，大家想贏同時當然亦唔想輸，估計初段都會踢得較謹慎，半場打和機會高。