今晚「死亡Ｃ組」壓軸好戲，荷蘭於瑞士伯爾尼鬥法國，荷蘭上場雖然贏得精彩，但防線一旦受壓仍存在不少漏洞，相反法國後防穩健如昔，上場咬唔入羅馬尼亞全因對手踢法格食格，面對攻優於守荷蘭料會有較佳發揮，平手盤波童捧法國。（now 632周六凌晨２時45分直播）
荷蘭上場大勝意大利表現的確抵讚，不過踢波一場還一場，意大利之所以大敗，好大原因係輸壞第一個問題球，當意大利落後兩球全軍反撲，荷蘭防線其實暴露唔少空位，能夠保持不失只係意大利把握力差，兼且雲達沙上身，唔代表荷蘭後防好穩陣。記得巨高首場分組賽時講過，荷蘭近年大賽失利致命傷係後防輕出，波童好同意呢一點，而且首場分組賽贏得咁精彩，波童擔心勝利會沖昏佢頭腦，因而忽視防線脆弱弱點。
後防穩健平手盤秤先
法國首場被羅馬尼亞悶和，演出冇荷蘭咁搶鏡，但賽後批評主要集中進攻問題上，後防演出其實同以前分別唔大，穩健程度依然可信賴。面對密集防守、體力壓迫性踢法，以目前攻力疲弱法國要破關真係唔易，不過頭先講過荷蘭踢法主攻，布防一定唔及羅馬尼亞咁嚴密，相信經驗老到法國球員可以搵到更多空間搵食，演出會比上場有改善，平手盤可秤先。