今晚上演歐國盃D組次輪賽事，頭場由瑞典對西班牙，兩軍首仗都有水準演出，同樣三分在手，故今場失分亦未致絕望。雖然瑞典首場踢落有板有眼，但對手只係跌Watt希臘，贏波根本唔算出奇，而今仗又有韋希姆臣及阿歷山達臣兩位正選因傷缺陣，對人腳一般瑞典係一大考驗；相反西班牙剛戰狂數俄羅斯，球員狀態正盛，而實力亦在對手之上，嘉輝簡單要1.65倍西班牙W。
（now 632周日凌晨零時直播）
瑞典缺兩主力
談到瑞典，嘉輝永遠覺得佢十年如一日，正宗比上不足、比下有餘，唔會缺席決賽周，但入到去又冇乜驚喜，相信多少同拿格碧克帶隊有關。呢位頭第三度帶領瑞典出戰歐國盃，可惜佢唔多喜歡試新，用用去都係幾件，但人係會老，瑞典班主力大多已過高峰，就如上場正選十一人中，竟然有七個係「三字頭」，而軒歷拿臣及阿歷山達臣更加三十有六，咁「老陣」點同年輕力壯西班牙抗衡！
再者，除拿格碧克「念舊」外，亦反映出瑞典青黃不接，冇乜新人信得過，今晚球隊右邊仲要缺少受傷韋希姆臣及阿歷山達臣，其實都幾牙煙。
「王子」意猶未盡要發洩
至於西班牙就唔同，人腳盛、實力強，上場怒炒俄羅斯盡現霸氣，高昂狀態下迎戰瑞典，贏波難度唔高。雖然上場賽後爆出射手費蘭度托利斯不滿領隊阿拉干利斯早早換走佢，但嘉輝反而認為係好消息，如此一來證明「王子」意猶未盡，上場大把貨未有機會發洩，今場仲唔一次過射爆瑞典。而西班牙又冇傷冇病精銳盡出，一於簡單要西班牙Ｗ！
西班牙戒驕有運行
文： 黃興桂
歷史上以弱勝強例子比比皆是，聖經舊約大贏巨人、法國拿破崙遭遇滑鐵盧、古希臘木馬屠城記，全部都係被視為實力較弱一方取得最終勝利，今屆NBA總決賽，唔少球迷賽前都睇好擁有常規賽MVP高比拜仁壓陣洛杉磯湖人，可惜尋日早上第四回合，湖人隊於一度領先超過廿分情況下，竟然被波士頓塞爾特人奇反勝，原本湖人總場數可扳成二比二，如今卻變成落後一比三，再次證明「驕兵必敗」道理，如果力湖人西班牙球星賈蘇可以獻計畀自己國家足球隊，呢四個字相信會係最佳選擇。
俄羅斯上盤照捧
西班牙首輪分組賽表現無疑係D組入面最好一隊，論人腳固然比其他三隊優勝，技術層面上亦凌駕於對手，只要比賽時集中精神，唔好學湖人一樣大意失荊州，要取得一席出線資格問題不大；今晚佢於因斯布魯克火併瑞典，賽前客W不斷升溫，如今熱至1.65倍，足證外界對西班牙信心十足，Peter都睇好佢，可取客W。
另一場賽事希臘對俄羅斯，俄軍上仗雖然不敵西班牙，但攻守仍有一定法則，有希丁克呢名戰術大師坐鎮，有力擊敗今非昔比希臘，俄軍讓平半可捧上盤。
瑞典粗枝大葉難偷雞
文： 江忠德
雖然足球場上係兵不厭詐，但係贏波始終都要靠真正實力，瑞典領隊同球員以為出口術讚西班牙好波，就可以麻醉敵人咁就錯喇，西班牙今非昔比，立定主意唔再陪太子讀書，邊有機會畀瑞典偷雞？
西班牙能夠輕取俄羅斯，同佢球員走位兼分工清晰有好大關係，當然俄羅斯避重就輕蓄意留力，先至令到西班牙好似踢熱身賽咁輕鬆贏波，呢場對瑞典至係真正考驗。西班牙由外圍賽到熱身賽一直都好掂，關鍵在於條中場線夠硬凈，靈活走位加上個人腳法上乘，應該可以剋制住踢法粗枝大葉瑞典。
瑞典賽前一味認低威，心理戰呢招大賽冇乜用，反而打擊自己士氣。上場砌低希臘可以話係對手表現失準，加上牛高馬大身形形勢上取勝，但係面對西班牙水銀瀉地走位入楔，就會凸顯瑞典轉身較慢弱點，今晚隨時出醜。
另一場希臘對俄羅斯，希臘上屆捧盃靠成班球員眾志成城，但係首戰對瑞典冇晒呢種戰鬥精神，尤其到下半場表現鬆散，輸波好自然。缺少兩個主力前鋒，對俄羅斯講影響幾大，希丁克輸畀西班牙之後玩低調，佢愈靜就愈得人驚，十足十暴風雨來臨前夕，今晚好可能會展現奇兵本色。
費蘭度托利斯直腸直肚我鍾意
文： Jamie Yeo
今日又輪到我愛隊西班牙出場啦！對手仲要係同組實力最強瑞典，真係好希望西班牙可贏多場提早晉級。
唯一壞消息，就係「王子」費蘭度托利斯今場未知有冇正選踢，佢上場被換走後，拒絕同領隊阿拉干利斯握手，呢件事搞到軒然大波，不過有時球員脾氣，真係好似細路仔咁，呢或者就係拉丁人性格，直腸直肚，無論開心同唔開心，你都可以感受到，難怪好多人都話，拉丁人性格浪漫，係最好情人啦，呢點我都好同意，但今晚強敵當前，西班牙千祈唔好受到影響呀。
望西班牙瑞典攜手出線
至於另一場俄羅斯對希臘，俄羅斯前身蘇聯係首屆歐國盃得主，而希臘則係上屆冠軍，呢係咪就係中文「首尾呼應」呢？兩隊首場分組賽都輸波，今場再輸就出局，呢場波我冇乜立場，決定兩邊都唔幫，因為我最想係西班牙同瑞典齊齊出線。
提提你啊！
今日係星期六，各位上班一族睇波可以睇夜，聽晚開始會上演第三輪分組賽，兩場波同時間舉行，都係兩點九開波，唔慣捱更抵夜睇波朋友，就要珍惜今晚機會，睇最後一場早場喇！
Jamie Yeo
新加坡辣妹才女，身兼模特兒、電台DJ及STAR Sports周四晚8點足球節目《Soccer Cities》主持人，偶像係亨利。