做領隊做到好似秘魯迪蘇拿都算係咁，雖然佢因為國家隊熱身賽輸畀墨西哥畀球迷怒插，心灰意冷之下想辭職，但得到隊長蘇蘭奴等人力勸之下決定暫時作罷！既然球員咁撐佢，聽朝世盃南美洲區外圍賽主場對哥倫比亞，當然要做齣好戲，主隊可捧！（有線61、廣東體育周日早上9:00直播）
哥倫比亞失波多
秘魯輸畀墨西哥四球之後，有傳主帥迪蘇拿打算劈炮唔撈，但當地足總同隊長蘇蘭奴為首一班球員要求下，佢先至決定帶隊捱埋緊對哥倫比亞同烏拉圭世盃外圍賽。考慮到球員咁擁戴迪蘇拿，相信今仗會以贏波作實際支持，加上即將轉會費倫天拿中場祖安華加斯可望趕及傷愈，秘魯實在值得秤高。
況且，秘魯主場威力亦唔好睇小，佢世盃外圍賽先後打和巴拉圭同巴西，迎戰哥倫比亞絕唔輸蝕。至於客軍方面雖然有卡路士山齊士同古亞連等外流球員歸隊，但睇番佢近五場熱身賽失八球之多，都係信唔過。