歐國盃A組出線生死戰由土耳其鬥捷克，捷克對上兩仗表現平平無奇，前鋒真高拿、巴路士及施安高級數一般，攻力曳之餘隊波冇創造力，呢場要讓平半搵你要。土耳其雖然有主力安利等受傷缺陣，但球隊打法整體，少一兩個影響唔大，今仗點秤都係五五波，土耳其受讓嗒得杯落。
（now 634周一凌晨2時45分直播）
安利美田缺陣影響微
土耳其上仗絕地反擊，面對主辦國瑞士毫無懼色，雖然一度落後，但最後連入兩粒反勝，球隊士氣大幅提升。一對中場拍檔隊長安利及老將美田今仗均因傷缺陣，但土耳其打法整體，唔係依靠一、兩個球員發辦，就算他倆缺陣，咸美艾天托普及卡拉丹尼斯等都做到其工作，所以對球隊影響唔大。
土耳其最強搶分武器係後防，「鬍鬚佬」施田一夫當關演出搶鏡，而正選中堅哥漢薩上仗因傷唔出得，但佢已經好番復操，條防線齊整番，以捷克疲弱攻力，好難咬得入佢。
講好多次，捷克冇尼維特同路斯基；真高拿及加拉錫又垂垂老矣，再加埋巴路士不在狀態，捷克冇晒昔日銳氣，已經變成一支平庸球隊。首仗鬥瑞士雖然贏波，但全場毫無甜頭，所入一球亦毫無組織；次仗對葡萄牙就原形畢露，輸三個一皮。領隊布克拿話今仗會打番四四二陣式，畀巴路士同真高拿齊齊上場搏殺，但佢都唔夠靈巧撕破土國防線。橫睇掂睇，捷克都冇讓波本錢，一於捧下盤。
生死戰謹慎要埋「細」
今場如果打和就要依新例即時射十二碼決勝，雖然兩軍賽前都話會鬥攻，但去到生死關頭應該唔會亂，打和最多咪射十二碼，所以咪盲目亂信呢心理戰謠言，今仗雙方都會好謹慎，玩多瓣細好過。
射12碼心得如Shopping
文： Jamie Yeo
話咁快，歐國盃又到最後一輪比賽，踢埋呢幾日就會產生八強，唔知大家心情係點？今晚A組葡萄牙對瑞士，兩隊懷兩種心情比賽，瑞士作為東道主，卻成為首支出局球隊，踢埋呢場就正式拜拜，而葡萄牙已篤定首名出線，下場淘汰賽就要同敵方廝殺，今場例行公事結果會係點？真係要睇過至知。
見到瑞士出局，真係有戥佢唔抵，因為佢已經好落力，可惜到目前為止，仲係一分都唔到，相信瑞士國民一定好唔開心，好彩佢打完波，好快就可以返屋企，唔使點執包袱嘛。
施治試除頭套撲波
至於葡萄牙近日焦點，畀「大菲」史高拉利搶晒，因為佢歐國盃後就會車路士嘛，而且仲話會買我相當欣賞西班牙前鋒韋拿添，車仔人強馬壯，真係有擔心我愛隊阿仙奴。
今晚另一場土耳其對捷克就緊張好多啦，因為邊隊贏波，就可進身八強，如果打和，仲會以史無前例十二碼決勝添。雖然好多球員都唔鍾意十二碼決勝，但站觀眾立場，就好希望睇到佢玩呢個「俄羅斯輪盤」，因為咁先夠刺激嘛。施治救十二碼陣，可以考慮除低個頭套，話唔定對手睇唔慣，殺佢一個措手不及呢，哈！
射前切忌心大心細
講開射十二碼，其實我都有少少心得，因為同我平時Shopping原理差唔多，掃貨前，首先要確定自己想買乜（即係好似球員咁，應該一早諗定點樣射），然後就集中精神向住自己目標進發，千祈唔好畀其他減價貨或Sales甜言蜜語影響（小心門將假動作呀！），切忌射門前心大心細，舉棋不定啊！唔好以為我得把口呀，成個衣櫃都係我戰利品呀！
Jamie Yeo
新加坡辣妹才女，身兼模特兒、電台DJ及STAR Sports周四晚8點足球節目《Soccer Cities》主持人，偶像係亨利。
提提你啊!
睇咁多場波，朝早一定精神不振，各位姊妹唔好懶，屋企可以邊做瑜伽邊等睇波，唔只唔會，仲好有提神作用。
大賽唔係年年有，男友睇波唔好嘈佢喇，煲多湯水畀佢補番，佢一定好感動，仲錫到你添。
歐國盃Baby話你知！
文： Baby呂慧儀
尾輪分組賽不設早場
今日開始連續四日都係分組賽最後一輪，兩場都會一齊香港時間凌晨兩點九開波，即係話冇早場睇，大家可以瞌多一陣，不過，記得校定鬧鐘喎！
葡軍留力C朗要抖抖
葡萄牙肯定出線，領隊講到明話會畀班主力抖抖，咁就慘喇，C朗唔出場，咁我咪冇得睇佢表演？
直落睇埋世盃外圍賽
今日除歐國盃，仲有世界盃南美洲區外圍賽，尾場時間仲夾得好，睇埋就可以霸定位，同爸爸飲早茶慶祝父親節。
全民大搜查
今日焦點當然係土、捷大戰，調查首次出現一面倒結果，接近八成受訪者認為呢場會打和，睇大家都渴望睇互射十二碼喎！而如果真係互射十二碼，捷克似乎就秤高些少，有五成七球迷睇好佢射贏。
土、捷90分鐘賽果？
土耳其勝 12%
捷克勝 9%
和 79%
土、捷十二碼賽果？
土耳其勝 43%
捷克勝 57%