世界盃南美洲區外圍賽，今晚至聽朝好戲連場，巴西同阿根廷分途出擊，頭場上演「雙巴之戰」巴拉圭主場對巴西。巴西兩大核心卡卡同朗拿甸奴因傷冇入選，正所謂蛇無頭不行，「森巴兵團」攻力勢必大受影響，加上巴拉圭以擅守見稱，Mic少建議捧入球細。
（有線足球台61周一凌晨3時直播）
五屆世界盃冠軍巴西每次出賽，往往成為大熱門，但講到今場外圍賽，佢的確存在唔少暗湧，當中以卡卡同細哨齊缺陣最為不利。眾所周知，兩人近年都係球隊鎮山之寶，進攻靠晒佢發辦，冇佢影響有幾大？早前熱身賽吞委內瑞拉兩蛋，就已說明一切。雖然話今場係正式大賽，巴西或者會較認真對待，不過失去卡、朗二人後，能否踢出以往水銀瀉地攻勢，實在令人懷疑。
冇卡卡細哨死晒火
再睇巴西今次大軍名單，冇卡卡細哨，但過氣射手阿祖安奴就有份，就知領隊鄧加手上可用進攻人腳有限，另一前鋒路爾斯法比安奴雖然過去一季西甲有突出表現，不過踢國際賽又係另一回事，畢竟隊友唔同，未必可以發揮出球會水準，想睇巴西瘋狂入波球迷，今場好大機會失望。
至於巴拉圭今次外圍賽仍然維持其穩健風格，踢四場只失一球，不過球隊踏入○八年後亦陷入入球荒，近五場比賽只有一球進帳，以佢疲弱攻力，今仗肯定唔敢同巴西鬥攻，反而會用番自己最拿手穩守突擊，同對方周旋。估計今場賽事入波都係一球起、兩球止。