既然已經肯定B組首名出線，「格仔軍團」克羅地亞今晚分組賽對住殺氣騰騰波蘭，陣容有保留都係人之常情！至於波蘭今場就算贏波，都仲要望奧地利贏埋德國先可以出線，機會渺茫，但由波蘭政要連日言論，睇得出呢支國家隊國內極受重視，為名、為利、為尊嚴，相信波蘭上下都會力爭今場贏波，好好睇睇出局。（now634台周二凌晨2:45直播）
過海就神仙，都首名出線喇，克羅地亞領隊比歷賽前已經講到明，今場會收起幾件「緊簿」主力，包括羅拔高華、施蒙歷、莫迪歷、達里祖史拉同謝高歷高，兼會派「換腎勇士」卡斯歷等大後備落場，實行養精蓄銳等淘汰賽先再搏過。亦因為咁，今場三線實力肯定大打折扣，戰意難測下更係捧唔落手。不過亦好難怪比歷，無理由因為一場例行公事而浪費彈藥！
波蘭上下勁撐國家隊
至於波蘭，第一場輸畀德國之後，有前高官出話要剝奪「叛徒」普多斯基國籍；第二場補時階段輸十二碼、一比一和奧地利之後，總理圖斯克更表示睇緊波陣想殺死個球證……種種反應，證明波蘭國家隊國內極受重視。所謂人要面、樹要皮，就算波蘭今場贏波都好大機會出局都好，相信以卡斯洛域為首一班波蘭球員，都會力圖最後一場分組賽爭氣贏波，以答謝各界厚愛啦！
講時講，如果波蘭上場唔係畀奧地利逼和，B組個次名出線席位都仲有價講！陣中主力好似施莫拿歷克同卡斯洛域都有唔錯表現，一柔一剛，連續兩場都畀到對手好大威脅，希望兩人今場繼續有好表現，幫波蘭贏波「埋齋」啦！又或者真係有奇出現，德國輸畀奧地利呢！克羅地亞？等淘汰賽先再支持都唔遲囉！
潮人領隊比歷
講幾日球員，今日轉口味講領隊呀！要數今屆歐國盃最型領隊，我一定揀克羅地亞比歷。唔知點解，一睇佢個Look，就覺得佢係潮人，再上網摷佢料，原來佢仲係Band友，彈結他、作曲同唱歌都掂，唔知佢賽前會唔會用佢音樂才華幫球員減壓呢？