在「音樂之都」維也納，足球和音樂巧妙結合，引發出微妙的化學作用。奧地利分組賽瀕臨出局，就如曠世音樂「神童」莫扎特，一生潦倒鬱鬱不得志；而德國剛受挫仍奮勇向上，就像「樂聖」貝多芬，聾了仍寫出《第九交響曲》。周二凌晨奧地利硬撼德國，到時將奏出扣人心弦的命運交響樂！
艾雲舒捷斯感染力強
以波論波，奧地利只是歐洲三線球隊，球員人腳、經驗不濟，把握力亦平庸，但憑主場之利，打出不死鬥志，各人多走一步，逼得對手喘不過氣來。首仗雖不敵克羅地亞，但演出獲一致好評，次仗鬥波蘭更佔盡上風，完場前搶回一分，盡展永不言敗精神。
奧地利天資魯鈍，只能將勤補拙，這點和天才橫溢的莫扎特不盡相同；但後者一生命途顛簸、貧病交煎，三十五歲就英年早逝，和奧地利目前窘境遙相呼應。現時球隊兩戰僅得一分，要奇出線，就非勝德國不可。中場靈魂艾雲舒捷斯今仗繼續領軍，這個「左腳仔」感染力強，未滿廿歲就當上國家隊隊長，有「奧地利碧咸」之稱。
波歷克送上《安魂曲》
貝多芬雖然「能文不能武」，但身為德國人，亦得傳不屈不撓的「日耳曼精神」。雖然生於貧苦家庭，但他從沒放棄當音樂家的理想，年紀輕輕就遠赴維也納闖天下，就像現時德國遠征奧國爭奪歐國盃一樣。他於音樂世界揚名立萬、成為永垂不朽的傳奇，但中年患上耳疾，其後更雙耳全聾。但德國人性子堅毅，他排除萬難繼續創作，《第九交響曲》就在這時面世。
於足球歷史上，德國從未認輸妥協，本屆歐國盃分組賽戰績雖未如人意，但這只是微不足道的挫折，「日耳曼兵團」勢要一舉擊潰主辦國，隊長波歷克演出自然極為關鍵。這名全能戰士本屆賽事尚未打出水準，今仗必定出盡法寶，左右開弓爭取入球。莫扎特離世時，遺作《安魂曲》尚未完成，德國今晚就要大筆一揮，助其了結心願，送奧地利最後一程！
德軍要省靚番個招牌
文： 黃興桂
B組最後一輪分組賽今晚同步上演，基於克羅地亞已篤定首名出線，為免球員受傷或牌，有理由相信佢今仗會派出大量副選落場，所以波蘭大有機會全取三分，出線熱門德國於另一場對東道主奧地利自然要靠自己。
奧地利頭兩場分組賽踢出永不言敗精神，而且目前仍有些微出線機會，成績已算合格，整體表現比另一主辦國瑞士抵讚。
德國上場意外地不敵克羅地亞，今場最低限度要保持不敗才可晉級，以該隊平均質素達標不難，預期可順利贏波晉級八強，如嫌客W賠率太低，可捧「讓球客勝」。
俄國衰在把握力差
前晚Ｄ組次輪分組賽，俄羅斯一比○擊敗希臘保持晉級希望，觀乎整場賽事，俄羅斯其實佔壓倒性優勢，只能小勝一球某程度反映佢前鋒卡士唔夠、把握力不足，跟其他勁旅如葡萄牙、西班牙、荷蘭相比始終技遜一籌，莫講話能出線八強爭標，最後一場生死戰面對瑞典亦未必有十足必勝把握，想押注佢出線朋友認真要三思。
愛犬對格仔兵情有獨鍾
奧地利搏老命有德鬥
文： Jamie Yeo
歐國盃咁精彩，連我隻寶貝狗Fudgie都晚晚追，平時呢隻懶狗可以24小時處於睡眠狀態，但近來為睇波，竟然將個生理時鐘都調校埋，總之一到夜晚開波就醒神，真係狗仔也瘋狂！咁都好，起碼我有Fudgie陪住，所以呢，我都會回贈番一大堆薯片碎呀、朱古力碎畀佢分享。
講開呢隻可能係全宇宙對足球最靈敏狗仔，唔怕話你知，佢係克羅地亞fans！每次見到紅白格仔出現，佢就異常興奮兼狂吠（打氣），落力過唔少球迷。雖然領隊比歷球隊賽前係冷門（Under-dog），但都畀我呢隻靈犬睇中，都算神奇。
西班牙避過荷蘭謝天謝地
克羅地亞因為已Book定八強一席，今晚對波蘭可以大踢風流波。相反，奧地利對德國一場就緊張得多，兩隊為出線誓踢出最高水準，主辦國之一奧地利為求保命，肯定傾出所有，相信會同德國鬥到九彩。
另外，我想講我至愛西班牙，佢到目前為止都冇可以挑剔，贏瑞典後以首名出線，八強避過狀態大勇荷蘭，謝天謝地！更精彩係韋拿又入波為西班牙奠定勝局，我真係好希望佢會加入我最愛球隊阿仙奴啊！
Jamie Yeo
新加坡辣妹才女，身兼模特兒、電台DJ及STAR Sports周四晚8點足球節目《Soccer Cities》主持人，偶像係亨利。
提提你啊!
克羅地亞紅白格仔夠出位，原來全世界男士們日日「掛住」領呔，相傳都係由克羅地亞人發明！
6月25日係克羅地亞獨立日，如果佢打到入26日開戰四強，有國家大事助興，相信會打得分外醒神。