19/06/2008
文： 黃興桂
歐國盃八強今晚展開，葡萄牙強勢撼德國，雙方實力相距不遠，平手盤Peter寧押注葡萄牙，最大原因係基斯坦奴朗拿度（Ｃ朗）持續大勇，今季已幫曼聯贏得英超及歐聯冠軍，集萬千榮譽於一身，相反德國隊長波歷克生成二奶命，這些宿命論有時候不得不信。
法國衰黑白太分明
況且葡萄牙最後一場分組賽於穩得出線權情況下，讓主力休息實收以逸待勞之利，平手盤捧葡萄牙基本上係不敗。
死亡Ｃ組結果塵埃落定，意大利成功逃出生天，表現進取當然值得稱讚。法國近年已成強弩之末，除球員青黃不接，領隊杜明歷未能將陣中黑白球員融合一起亦係一大敗因。Peter曾經香港波，知道要好成績，先決條件就係要將陣中華洋球員打成一片，球隊士氣先會好，處理這問題，法國前領隊積基特或拿美爾明顯都比杜明歷優勝。
至於羅馬尼亞將出線權拱手相讓，只可怪自己不才，呢隊波擅守不擅攻，於非勝不可情況下完全將缺點表露無遺，今場亦可睇到荷蘭副選陣容一樣極具威力，尹佩斯經過上季於阿仙奴長抖，餓波太耐夠晒新鮮感，入波亨特拉爾亦充分證明佢有實力同雲尼斯達萊爭逐正選，難怪橙色兵團奪冠前景愈被看好。