葡兵過關未必“德”

歐洲盃八強淘汰賽今晚展開，入得八強當然隊隊有番咁上下，葡萄牙對德國屬於一場勁量級大戰，表面上葡萄牙比較着數，因為上仗對瑞士收起大部分主力，可以養精蓄銳向德國挑戰，加上頭兩場有出色發揮，相信球迷都會較為睇高葡萄牙半線。

不過，千祈唔好忘記德國一向都係老奸巨滑，況且踢大賽經驗十足，尤其去到淘汰賽階段，一場過德國更有策略性，所以葡萄牙今仗毫無必勝把握，預料九十分鐘內未必能夠分出勝負，初盤平手絕對正路，追和係首選。

葡萄牙今屆打法的確令我改觀，以往葡萄牙球員畀我印象都係個人主義特強，太過表現自我，獨食、欠缺整體性，但經過斯高拉利多年的調教後，葡兵今屆確係有高水準發揮，球隊以整體性為主，連C朗都做一個策劃者，再配合迪高、莫天奴、森馬奧及紐奴高美士等，可以話越夾越熟，只要保持目前水準及狀態，的確可以躋身歐洲一線強隊，不過今晚遇上德國，能否繼續有高水平演出，就係一個極大考驗。

德國在分組賽踢唔出任何霸氣，但呢點一向都係德國本能，每次大型賽事都踢到“唔嗲唔吊”，但最終又可以殺到入決賽，所以德國在過去三場表現，根本不可作實，如果葡萄牙諗住對手打得差而掉以輕心，分分鐘畀德國乘虛而入。

推介：和波 1：1