西意大戰和味濃

八強之中另一場重量級大戰今晚爆發，西班牙火併意大利，兩支球隊都係本人今屆熱門之選，手掌手背都係肉，都唔知點揀。事實上兩隊確係勢均力敵，勝負要睇臨場表現、運氣以及其他因素，初盤開平手，九十分鐘內和波應該最合理。

如果鄧納東尼本《友好手冊》當中，冇雲巴士頓個名我真係唔信，“鄧生”有呢個老友真係終身無憾，相信各位球迷都明我講乜。至於意大利能否戰到最後，就要睇班球員的戰意，講真一句，意大利三場分組賽並非踢得太差，中前場進攻能力亦具威脅，只係盧卡東尼對射門鞋“冇電”。但話時話，今仗意軍有中場重心派路與加度素停賽，無論進攻及防守都大受影響。過去三場派路的鋪橋搭路，後上助攻都係極具殺傷力，加度素的攔截亦相當重要，可惜對手西班牙最大優勢在於中場線，如果沙維與恩尼斯達毫無阻滯可以任意發揮，對意大利防線必會構成重大威脅。事關大衛維拉及托里斯都係極度危險人物。

不過，西班牙亦有隱憂，因為後防方面仍未給予球迷信心，輕上助攻的拉莫斯及甘迪韋拿攻優於守，係防線上最大致命傷。始終意大利的前鋒並非二打六，偶一失誤，分分鐘鑄成大錯。其實邊隊贏輸都好，最緊要兩隊合演一場精彩大戰。

推介：和波2：2