23/06/2008
文： 黃興桂
「橙衣兵團」荷蘭又再一次撻Ｑ，唔好嫌Peter長氣，呢場波再次證明踢波，永遠都係實際遠勝漂亮進攻足球，荷蘭中前場有六七位力歐洲大球會頂尖進攻球員，例如雲尼斯達萊、史奈達、古積特同雲達華治等等，但防線上搵個較為有名球員都冇，連經歷女兒過身之痛保拿奴斯，都要頂硬上，就知佢有前冇後問題幾咁嚴重。難怪畀年輕力壯、兼有「老狐狸」領隊希丁克指揮俄羅斯擊破。
以兩隊呢場表現，俄羅斯九十分鐘內未能勝出，其實好唔抵，淨係睇角球數字，都知俄羅斯佔好大優勢，荷蘭只係靠罰球反擊，講正常比賽時間，唔夠俄軍鬥。可見一支球隊有一位好領隊執，的確打高好多，希丁克完全洞悉荷蘭踢法，反觀雲巴士頓相形見絀。
貼冠軍最緊要守得叻
今屆歐國盃踢到依家，俄羅斯同土耳其可以進身四強，的確令唔少人跌眼鏡，就目前形勢講，德國好似較有優勢，不過Peter都唔敢大注押任何一隊身上。球迷可以任意捧自己鍾意球隊，但投注者就要識得揀防守力強球隊，呢場賽事亦都提醒各位領隊，想要勝利，想要冠軍，防守絕對係最重要一環。有頭冇尾，根本冇意思，就如起屋一樣，先要打好地基，Peter以往做過練，最能體會到呢點。