25/06/2008
文： 朱楓
隨住世界盃亞洲區外圍賽第三圈結束，日職又再重新展開，當中大阪飛腳會今晚主場對京都不死鳥！飛腳之前失分太多，為保持爭標機會，相信今仗一定毫無保留，對住鋒力疲弱不死鳥，贏兩粒冇難度，2.2倍「讓球主勝」「奸巴爹」！（開賽時間：周三晚6:00）
飛腳今季開局令人失望，暫時只得十九分排第八，好彩只比榜首紅鑽少七分且打少場，今仗贏波可重返爭標行列，戰意唔使懷疑。事實上，隨住順利殺入亞冠盃八強，飛腳近況有回勇象，好似上仗聯賽就贏紅鑽三比二。雖則前鋒播戶龍二、中場寺田紳一及中堅明尼路繼續養傷，後安田理大隻腳更加腫到好似收埋個棒球咁，唔使預佢，好彩國腳中場遠藤保仁（右圖）已經歸隊，配合盧卡斯同巴爾一對森巴射手，飛腳絕對有本錢大勝。
對家不死鳥近況就認真麻麻，連埋盃賽，近十場得兩勝兩和六負，最叻一場都係入得一球，計鋒力排日職尾二，雖則佢件巴西中場費蘭甸奴好好波，連飛腳主帥西野朗都忌佢三分，但係其他人確實唔掂，對住飛腳輸兩粒真係走唔甩！