西班牙毀“斯”滅跡

西班牙與意大利火倂一百二十分鐘之後，最終以點球贏波晉級四強，今晚再戰俄羅斯，由於分組賽曾經四比一大勝對手，所以心理上應該佔優，但阿拉干尼斯睇咗俄羅斯打後三場比賽之後，今仗絕對不能掉以輕心，難怪初盤開出西班牙只係小讓平手/半球，表面上認真着數，但內裡確有乾坤所在。不過，捧開西班牙兼且相信實力勝於一切，所以今日仍向大家推介西班牙可以贏波。

西班牙對意大利一仗雖然在艱苦作戰，但場上仍然取得一定優勢，尤其是在攻門方面，全場總共取得廿六次射門，唯一可惜只係今仗埋門威脅力不足，可能係意大利的“鐵桶陣”夠晒實淨，又或者西班牙有些少驚輸感覺，所以在進攻方面未能踢得更放，既然最大勁敵都已經解決，而今晚對手亦只係手下敗將的俄羅斯，應該可以發揮出本身水準。另外，俄羅斯三場脫胎換骨表現，令到西班牙加以防範，只要做足防範措施，入決賽問題不大。

完全技術性擊倒荷蘭晉級四強的俄羅斯絕對合情合理，自從一比四大敗畀西班牙之後，軒迪克不單止極力改善後防漏洞，而且更加利用“進攻就係最佳防守”打法向列強宣戰，艾沙雲、柏夫路真高及沙恩高的俄式“三叉戟”果然威力驚人，搞到荷蘭陣腳大亂，呢招能否在西班牙身上見效？不妨拭目以待。

推介：西班牙 2：1