26/06/2008
文： Jamie Yeo
《美女與野獸》（Beauty and the Beast）係我最鍾意迪士尼電影，呢套戲實在太出色，所以亦成為唯一獲提名「奧斯卡」最佳電影全動畫製作。雖然佢最後不敵《沉默的羔羊》，但無論如何佢都係我心目中No.1好戲。
你或者奇怪點解我會用電影做開場白，其實呢套戲戲名，正係今晚歐國盃四強大戰「西班牙Vs俄羅斯」寫照。
相信大家仲記得我熱捧西班牙，佢精彩進攻足球為今屆賽事生色不少。但係上場佢令我幾擔心，差被意大利悶波戰術搞掂，我求神拜佛今晚場波唔好再悶親廣大球迷，西班牙帥哥們，放膽繼續進攻吧！唔好忘記分組賽你贏過俄羅斯四比一，請你讓我再次興奮、為你喝采！
艾沙維光芒媲美韋拿
至於俄羅斯就真係每場都見到進步，即使我係西班牙fans，我都要讚佢，統帥希丁克乜都算到，真係犀利。同樣鋒芒畢露仲有艾沙維，我認為佢同韋拿係今屆賽事真正巨星。
好，波經講住咁多先，至於我應承過大家專欄分享我健身趣事，長話短說，我尋日做Gym本來順順利利，直到我玩舉重機，我就幾乎辛苦到谷到上腦，幸好隔鄰有位「筋肉男」仗義相救，即刻扶我一把，令我「走出死門關」！練完之後我仲可以嗒住杯雪糕新地返屋企，算係有驚無險完美結局。我衷心希望西班牙今晚同我「做Gym趣聞」一樣，逢凶化吉，笑到最後。
Jamie Yeo
新加坡辣妹才女，身兼模特兒、電台DJ及STAR Sports周四晚8點足球節目《Soccer Cities》主持人，偶像係亨利。
提提你啊!
呢一套經典電影《美女與野獸》，搵到歌星Celine Dion唱主題曲，呢首歌仲獲得奧斯卡最佳原著配樂，以及最佳歌曲大獎。
俄羅斯於92年之前稱為獨聯體及蘇聯，曾於60年歐國盃贏過一次冠軍，之後於64、72同88年共三次打入決賽，睇今屆可唔可以再入決賽？