皇馬轉會市場外憂內患

C朗拿度的去留仍然未有定案，為了迎擊皇馬的收購，有消息話曼聯決定開張新合同畀佢，合同年期係五年，總值超過五千萬鎊。若C朗肯簽，到合約屆滿，佢已經係廿九歲，黃金時間已過。換句話講，若C朗簽約，好大機會在曼聯度過佢嘅職業生涯，呢份合同將會係佢嘅“賣身契”。

為爭奪C朗，皇馬據講開到三十萬周薪。其實C朗都唔係咁大貪，早排只係要求十二萬五千鎊周薪，但畀曼聯否決。至於走到而家呢步，簽與唔簽，將可證實C朗早前講過佢係對曼聯忠誠的話。

皇馬搶購C朗，自己亦面對球員被搶的問題。原本皇馬準備除了銀彈政策，仲用羅賓奴作為交換條件。然而，自己畀人當附屬品當然唔高興，所以羅賓奴亦透過經理人同其他球會接觸，要顯示“我唔係廢嘅”。對羅賓奴有興趣嘅係車仔。車仔剛由斯高拉利接任，即從巴塞手中搶走迪高。下一個目標就係羅賓奴。好明顯，斯高拉利係想將車仔打造成一隊集巴西與葡萄牙國腳嘅球隊，咁樣在溝通上會好好多。而家車仔開價二千五百萬鎊收購羅賓奴，更重要一點係羅賓奴年底可獲得西班牙綠卡，即可以多出一個位畀歐盟球員，球會將可更主動。

車仔搶人，皇馬不敢怠慢，即時表態話會同羅賓奴續約。點解？若C朗唔過檔，羅賓奴又走人，到時鋒線將人手短缺，爭霸會遇阻滯。原來惹起羅賓奴不滿主要都係薪酬，三年前轉會皇馬，到目前合約未換過，薪水當然係冇加。每年除稅只得二千四百萬歐元，與佢嘅表現不相稱。皇馬將會開出的條件係除稅後三千五百萬歐元，且睇吓呢招又鬥唔鬥得過阿巴。