朗會踢曼聯定皇馬？

近日的轉會消息，真真假假，假假真真，一日未正式簽紙，或者未攞住件波衫影相，真係一日都未確實，正如車仔的死對頭曼聯一樣，雖然目前曼聯無乜轉會大動作，之不過，一個C朗的去留問題，已經搞出唔少流言蜚語。

其實講真一句，“費蛇”當初將C朗由士砵亭帶到世界最響噹噹球會曼聯，再經過兩三年磨練之後，由一個初出茅廬的小伙子，搖身一變成為當今球壇炙手可熱兼且大紅大紫的超級球星。試問一句，如果冇“費蛇”的話，C朗會有今時今日的成就嗎？當然，成功非僥倖，相信C朗亦都付出唔少代價及努力，但如今話走就走，似乎真係少咗人情味。事關C朗早前表示過，希望可以加盟皇馬呢支偉大球會，既然講得出呢番說話，即係話對曼聯已經出現離心。

最新消息，曼聯已開始出招，甚至出到差不多三百萬港元一個星期人工的世界最高薪紀錄，再加埋部分肖像權收益，希望可以挽留C朗，名與利都經已雙收的C朗，又如何抉擇。至於皇馬亦都死口咬住唔放，誓要奪得呢件心頭好，究竟又會以乜嘢天文數字，將呢位球壇天王帶到去貝拿比球場？

都係之前個句，一日未成事，講乜都係當吹水，C朗最終會喺邊到落腳，可以講畀大家知，不過，要等到球季開鑼之後。