|
05/07/2008
文： Mic少
美職聽朝繼續有波踢，聯賽榜老二哥倫布機員主場出擊鬥芝加哥火燄，機員自經過「黑色五月」後，近期表現回穩，而且火力十足，以佢主場超過七成得勝率，今仗有力再下一城，向榜首目標進發。（周日早上８時開賽）
哥倫布機員上季連季後賽都入唔到，但今季長期位居聯賽榜前三位，表現令人刮目相看，有此表現皆因球隊射手艾真度摩蘭奴近期發揮極佳，至今已有六個聯賽入球進帳，只係比佢上季總入球少一球，加上年僅二十一歲新星羅比羅渣士頻有驚喜之作，令球隊攻力大增。機員近四仗合共攻入十球，火力強勁絕對唔講得笑。
舒洛圖校炮更生猛
講到機員進攻人腳，不得不提阿根廷老將舒洛圖，呢位三十五歲前小保加球員，由以往鋒線搏殺轉為中場校炮手，雖然入波產量減少，但以佢技術同經驗，轉型後對球隊整體進攻其實更為有利，有佢供應，難怪艾真度摩蘭奴同羅比羅渣士今季腳風會咁順。
相比之下，芝加哥火燄近期就死晒火，佢已經連續三場聯賽冇波入，雖然上仗美聯盃取得大勝，不過對手只係低組別球隊，並唔能夠作準。而且火燄墨西哥名牌前鋒白蘭高近期表現冇料到，佢所取得四個聯賽入球有兩球來自十二碼，睇怕火燄都難逃作客三連敗囉！ 温馨小贴士：直接搜索“901”可以快速找到本站，查看更多更准更新的足球分析推介。
|
