車仔訪澳有乜星？

英超球會車路士將於七月尾來澳踢熱身賽，球迷焦點當然希望到時球星如雲，一睹多名世界級球員在場上獻技。

近期車仔轉會消息唔少，之前已簽入葡萄牙國腳波辛華，跟住傳出林柏特離隊加盟國米，又突然之間搵咗葡萄牙國家隊教練“大菲”斯高拉利正式執教，早幾日更有“巨人殺手”迪高加盟，相信都係“大菲”的穿針引線。講開又講，以迪高的年紀及身形，能否在英超發圍的確言之過早，但要在以體力為主、硬朗及快速攔截打法見稱的英超立足，可能踢到約滿都未適應。

迪高過檔之後，前隊友“細哨”亦公開表示，希望能夠再與恩師“大菲”合作，話晒○二年世界盃都一齊威過。傳出射手杜奧巴有意轉投巴塞，話唔定兩大球會一拍即合，交易隨時成功。另外，車仔目前正與皇馬傾緊另一巴西國腳羅賓奴，仲有傳出阿仙奴的艾迪拜約亦係目標之一。如果以上的轉會消息成事，本澳球迷的確大飽眼福。

其實講真一句，以車仔今時今日的地位，論財力物力，又點會咁失禮？就算“細哨”、羅賓奴及艾迪拜約都祇係吹水，但起碼施治、泰利、布歷克及艾辛等球星都已值回票價。至於對手又係國內球隊，大家就唔好要求咁高會係一場龍爭虎鬥，抱住睇球星風采的心態入場，咁就包你滿意！