07/07/2008
文： 麥馬拿仁
瑞典超停不了，今晚兩場賽事以哥登堡主場鬥希爾星堡較具投注價值，雙方實力接近，今仗開主、和、客三瓣都唔令人意外，所以改變策略吼大盤。哥登堡上仗慘遭滑鐵盧，主場金漆招牌被打破，今晚必狂攻力求反彈；希爾星堡係聯賽失波最多勁旅，唔介意同對手鬥攻，1.77倍分頭要得過。（周二凌晨２時開賽）
哥登堡主場威力好犀利，本季頭五場聯賽全勝，但到上仗鬥特利堡竟然淨吞兩蛋，令到唔少球迷大跌眼鏡。
聯賽早前因歐國盃停戰，哥登堡過一過冷河，再加上鬥特利堡有輕敵心態，搞到輸波而回。慘遭訓後，佢唔敢再大意，呢場必打真軍，九十分鐘狂砌希爾星堡。事實上，呢班波自己地頭特別多波入，頭五場就攻入十四球，今場照計唔會少。
馬干迪利連場士哥
希爾星堡一向有前冇後、打死罷就，球隊全攻型踢法極具娛樂性，好受球迷歡迎。呢班波有老而彌堅前鋒軒歷拿臣領銜攻堅，雖然佢最佳拍檔奧莫托約斯已經離隊，但另一前鋒馬干迪利腳風好順，已經連續兩場聯賽有波入，今場對手主攻，希爾星堡亦唔會龜縮，對攻之下入波唔會少。