10/07/2008
文： 關爺
今晚有八場賽事畀大家選擇，關爺認為彭美拉斯主勝係必揀場次。名帥盧森保高帶領下，彭美拉斯主場出擊惡到暈，聯賽四戰全勝，得勝率百分百，如果計埋州聯賽同巴西盃成績，○八年十場未輸過。相反費古倫斯作客即變軟腳蟹，近三仗全敗兼一粒都入唔到，呢個主W極之穩陣，係全日最佳變倍器。
費古倫斯近三作客大敗
關爺一向好欣賞盧森保高，呢位名帥功績一大籮，巴西好有名望，而事實佢係有真材實料，依家彭美拉斯好對辦，於主場更加惡晒，邊隊去到佢地頭，整定唔好彩。本季聯賽彭美拉斯主場全勝，攻入十球僅失三球，攻銳守亦堅，球員自信心爆棚，加上上仗作客明尼路失分，返到福地勢必加多兩錢肉緊。費古倫斯正宗係作客蟲，近三場作客分別畀高士路、法林明高同維多利亞大炒，今場九死一生。
美職方面，紐約紅牛狀態極曳，美聯盃出局後，上仗畀科羅拉多急流勁數四粒，肯薩斯巫師主場僅讓平半，上盤可取。諾高平於瑞典盃主場鬥甲組仔安高平，客軍實力極差，諾高平主W要得過。