11/07/2008
文： 蘇豪
聽日日職兩大喪攻王正面交鋒，大阪飛腳主場迎戰川崎前鋒，兩隊「士哥」數字雖然並非聯賽最高，但係佢素來以有前冇後踢法聞名，次次對親例牌上演入球騷，加上前鋒射手我那霸和樹弗爆，今場咪揀「主客和」，捧大啦！（周六下午６時開賽）
雙方入得失得
今季前鋒繼續貫徹全攻型打法，主要踢三五二陣式，兩隻翼直插對手心臟地帶，侵略性超強，不過後防就長期空虛。今季前鋒聯賽十五戰入廿五失廿三球，今周對手大阪飛腳數字接近，十五戰入廿三球失廿球，數據完全反映兩隊攻強守弱特性，大家都係同道中人。
近排前鋒箭頭我那霸和樹鹹魚翻生，上季佢受注射禁藥醜聞困擾，基本上冇乜踢過，依家還我清白之後，開始重現射手本色，已經連續四場有入球，加上王牌箭頭祖尼奴，鋒力唔使懷疑。飛腳就靠晒巴西大隻佬巴爾食胡，佢級數夠晒高，對住川崎前鋒條豆腐防線實搵到食。
兩隊對上九次對賽八度開「大」，淨係上次盃賽罕有地開「細」，開「大」八場全部最少有四球交收，顯示上次開「細」只係偶一為之，今次有望再次大手交易。