12/07/2008
文： 樂比堅尼
圖圖盃第二圈次回合賽事，瑞典球隊艾夫斯堡主場迎戰蘇格蘭喜伯年，首回合一如樂比仔所料，艾夫斯堡以二比○擊敗開操冇耐喜伯年，艾夫斯堡有兩球在手，今場唔使咁搏，一於博兩隊打和，3.3倍和波高回報。（周六晚9時30分開賽）
上場係喜伯年今季首場正式比賽，球隊只係操幾課就上戰場，落敗可謂意料中事，但經過一星期「地獄式集訓」後，球員已回復八成作戰狀態，今仗作客艾夫斯堡，就算未能收復失地，要保持不敗亦非難事。
一周三仗吃力
事實上，正值季初艾夫斯堡，雖然狀態較喜伯年佳，但球員卻有疲態，尤其係球隊要分心應付聯賽、瑞典盃同圖圖盃，三線作戰吃力不討好，周中對弱旅加費萊就以○比一落敗，而該仗艾夫斯堡係強陣出擊，與圖圖盃首回合對喜伯年一仗正選陣容相比，有十名球員相同，故一周內踢三場比賽，球員有疲態好正常。
喜伯年今季陣容變動唔大，默契上唔成問題，隊長羅拔鍾斯亦傷愈復出。由於艾夫斯堡已有兩球在手，未來幾周都要應付頻密賽程，故今仗和波都收貨，今場馬會冇開讓球盤或讓球主客和，樂比仔索性直接揀3.3倍「和」。