費格遜搵紅軍前助教幫手

“大菲”上車，葡萄牙立即邀請費爵爺的助教昆亞雷斯執教國家隊。經過半個月拉鋸，曼聯最終同意畀昆亞雷斯離開，條件係葡萄牙足協需付一百萬鎊畀曼聯。昆亞雷斯已到咗里斯本，並於周五落實上任，接手斯高拉利的空缺。昆亞雷斯離開後，曼聯當然要搵番位助教，而且已有適合人選。不過，或許會加深與紅軍的宿怨。

曼聯與利物浦為了英超王座成為宿敵。曼聯今次想搵嘅助教，其中之一竟然係賓帥前助教之一的柏高。目前，曼聯為費爵爺搵嘅助教人選，除了球會兩名現任教練外，以柏高最被看好，另一個係波爾多主帥、前曼聯後衛白蘭斯。

柏高○四年跟隨賓帥入利物浦，去年九月因與賓帥不和離開。合同規定至今年六月底，佢唔能夠加盟其他球會。而家已經係七月，合同效力已失。柏高之前已與多個球會接觸，準備落班，最近傳聞佢已準備選擇加入賓菲加任助教。不過，在一日未成事之前仍有變數。

費爵爺屬意柏高的原因，除了佢係世界級的體能教練外，更重要係佢清楚利物浦的內部，所謂知己知彼，百戰百勝。在下屆爭奪各項錦標時將大有好處。