14/07/2008
文： 朱楓
朱楓幾時都信一支球隊要贏波，先要有一條穩固防線。哈馬比近況雖然弗，弊在今場有多名後防主力打柴，對住主場未輸過馬模，睇怕都係時候斷纜，1.8倍主勝玩得過！（開賽時間：周二凌晨2:00）
貴為傳統勁旅，馬模暫時排第七，班高層當然唔收貨，有傳練朗奴尼爾遜已聞到魷魚香，今場肯定打醒十二分精神。無疑佢上場作客被弱旅辛斯華爾悶和○比○，不過朱楓相信馬模今晚返回主場可以反彈，事關佢今季主場未輸過，六戰獲三勝三和，韌力十足，絕對係條地頭龍。
哈馬比後防傷兵滿營
陣容方面，曾力查爾頓芬蘭國腳祖漢臣早排曾經客串中場，但上仗對辛斯華爾已打番前鋒，相信今場會夥拍暫時以五球成為球隊首席射手托禾倫一齊攻堅，鋒力絕對值得信賴！
連埋盃賽同熱身賽，哈馬比已經九場波未輸過，但實情佢防線傷兵滿營，包括正選門將沙賓等都長抖緊。上場對榜尾諾高平，已經要由中場拉迪倫同由乙組加盟前鋒蘇斯克客串後，結果一度領先三比○之下，最後僅勝四比三，防線完全唔掂，最慘今場仲有上仗梅開二度中場大將彼德安達臣同後荷西蒙迪路停賽，防線進一步削弱底下，你話今場受讓一球會唔會係個陷阱呢？