14/07/2008
文： 麥馬拿仁
今晚兩場瑞典超，拿仁對馬模好有信心，對住傷兵滿營哈馬比，佢憑主場之利應該可以贏番場。哈馬比上仗面對弱旅諾高平，後防竟然失三球咁多，咁都難怪，因為佢多名正選後都受傷缺陣，目前四人防線，其中一個係中場、一個係前鋒，條防線變得咁豆腐，點頂得住馬模先！（周二凌晨2時開賽）
哈馬比都算係瑞典超實力分子，但佢兵源其實屬於有限公司，目前遇上傷兵潮就好大鑊，多名戰將都要廖化作先鋒，打自己唔擅長位置。
防線兜亂射手停賽
睇番球隊一條後防線，簡直係慘不忍睹，首先正選門將沙賓缺陣，要搵副選龍門比祖隆頂上，四名後防只有基斯甸查奧爾及蘇斯克係正宗後，本身係中場拉迪倫以及剛加盟前鋒杜史特蘭，都因為冇人用而要頂住先，難怪對住攻力極弱諾高平，都要失三球之多。雖然近期佢成績唔錯，但對手實力不算強，缺乏真正考驗，今次鬥馬模仲有射手彼德安達臣停賽，點會有運行呢？
馬模近期腳風唔順，先於瑞典盃被哈馬比踢出局，上仗作客又悶和辛斯華爾，球隊上下都承受好大壓力，係時候要出真功夫向高層同球迷交代。睇番往績，馬模近年鬥親哈馬比都處於下風，屈咁耐，呢次仲唔趁你病你命咩。