16/07/2008
文： 力奇
去到瑞士集訓英超勁旅利物浦，今晚將進行佢當地首場熱身賽，作客出戰瑞士二流球會盧塞恩。實力高幾班紅軍雖然仲有幾名西班牙球員未歸隊，但整體陣容依然夠殺有餘，博佢贏夠兩球開2.15倍「讓球客勝」都好正路。（開賽時間：周四凌晨1:35）
上周末完成新球季首場熱身賽贏燦美爾一比○紅軍，轉戰瑞士之後，再會有阿根廷國腳馬斯真蘭奴同荷蘭球星古積特歸隊，雖然話二人未必會今仗上陣，但肯定會激發起其他落場爭正選球員鬥志，特別係新加盟好似杜辛拿同菲臘迪加，點會唔搏命先？
再者，對燦美爾一箭定江山班拿約，同埋久休傷愈復出丹尼爾艾格，顯然都狀態唔差，至於上仗僅以後備身份登場隊長謝拉特，又係同樣勇猛，就算少包括費蘭度托利斯同門將連拿等四件西班牙兵，領隊賓尼迪斯都仲有大把貨手，贏波冇乜難度。
盧塞恩人腳麻麻
盧塞恩方面，本來人腳已經唔係好，最慘係季前熱身賽戰績，對住實力平平都只係普普通通，上仗對住德甲多蒙特踢成二比二，已經係代表作。不過今晚佢撞歐洲一線利物浦，實力所限，睇怕想爆冷都有心無力喎。