19/07/2008
文： 麥馬拿仁
阿仙奴首場季前熱身賽，一如近年慣例，作客英乙友會班列特，雖然雙方級數懸殊，不過兩間球會本身「friend底」，兵工廠點都會畀面，唔會去盡，而且球隊開操冇耐，球員未上力，狀態同心態都難同正式比賽相提並論，今場純粹熱身鬆筋骨性質，故宜捧入球細。（周六晚10時開賽）
阿仙奴領隊雲格今次雖然揀選二十四名球員，不過艾迪巴約、尹佩斯、法比加斯、加拿斯，以至早前加盟「新施丹」拿斯尼都統統冇份，陣中較具級數球員已經係禾確特同賓特拿，再配合其他二線兵同預備組年輕球員，只能算係拉雜成軍，所以大家千祈咪畀阿仙奴個名呃倒，而高估佢。
前兩季交鋒未開過大
不過，就算阿仙奴雜牌軍人腳，仍高於班列特，但畢竟球隊開操，狀態肯定未操起。事實上，阿仙奴過去兩季季前熱身賽對住班列特，表現都唔見突出，一場悶和○比○，一場小勝二比○，而且雙方關係咁密切，阿仙奴即使想贏，亦唔會以大勝羞辱對方，估計都係點到即止算數，博細最數。