19/07/2008
文： 朱楓
今個周末，「英」氣逼人！英超Big3為備戰新球季，今晚齊齊出動踢熱身賽，將狀態提升之餘，最重要當然係磨練新兵、搶W威啦！朗尼、禾確特同謝拉特等一眾球星統統都準備就緒，三場大戰，一觸即發！
今晚曼聯將會進行南非之旅首站賽事，對手係凱撒酋長。雖然紅魔鬼今次缺少C朗呢位大紅人，但仲有朗尼同史高斯等主力飛，再加上曼聯兩年前正正呢個盃賽輸畀凱撒酋長，呢鋪肯定有仇報仇，1.8倍「讓球客勝」玩得過！（now632台及廣東體育周六晚9:15直播）
其實曼聯兩年前亦曾到南非參加呢個名為Vodacom Challenge盃賽，可惜半力出擊下，最後決賽射十二碼輸畀凱撒酋長只得亞軍。費Sir賽前話緊南非比賽唔易踢，希望藉呢個盃賽提升狀態，以費Sir一向咁要面性格，似乎佢咁講係想報番兩年前一敗之仇喎！
酋長不復當年勇
曼聯早前已經踢場熱身賽，結果憑卡域克同朗尼各建一功，作客輕取鴨巴甸二比○，表現對辦。雖然紅魔鬼今次去南非冇C朗、拿尼、雲達沙同艾拉四名主力，最新消息仲有中場夏格維斯打埋柴，不過二十一人大軍仍然非常強勁，當中包括朗尼、泰維斯、史高斯、里奧費迪南，同上季侯城踢到曉飛新星費沙甘保，似乎曼聯今次去南非唔似表演咁簡單。
曾經贏過四屆Vodacom Challenge冠軍凱撒酋長，近年成績不停下滑，上年聯賽更只得第六，迫使高層今季進行大換血，當中曾力查爾頓、有南非「周潤發」之稱前鋒巴列特更被放棄，依家可以講屬於重整階段。練伊圖加亦自知同曼聯冇得鬥，叫球員今場學就算，仲暗示會集中火力應付下場對奧蘭多海盜南非國家打大戰，戰意成疑，隨時被曼聯炒鑊甘都唔知咩事！