22/07/2008
文： 蘇豪
曼聯非洲之旅第二戰留守南非，今晚於開普敦中立場同奧蘭多海盜交手。「紅魔鬼」上場僅逼和凱撒酋長，傑斯賽前話明今場唔可以再失威，大軍熱身過後，狀態更進一步，估計可以順利贏波，曼聯「讓球客勝」有計！（now 632周三凌晨2時10分直播）
上仗曼聯對凱撒酋長，狀態明顯唔及對手，但一眾球星演出尚算落力，其中朗尼仲踢到有火，同對方球員有唔少埋牙鏡頭，鬥心唔講得笑，亦顯示佢好想證明自己，唔會流攤。老大哥傑斯賽前表示：「熱身賽勝負無關痛癢，不過我希望將贏波變成習慣，呢點真係好重要。」
兩年前炒四蛋
「紅魔鬼」守將里奧費迪南有傷在身，今場未必會踢，不過隊長加利尼維利已經好番，頭費格遜好有機會畀佢踢足全場，球隊級數勝對手，只要集中精神，贏波不成問題。雙方兩年前曾交手，當時曼聯輕鬆贏四比○，加上今場海盜快翼盧保安莫高拿料因傷缺陣，難望偷雞，再畀人大炒唔奇！