多蒙特最近几「舒」服

2018-02-20 20:40:24 来源:互联网

photo_819360.jpg
巴舒亚尔嚟到多蒙特之后迅速征服球迷。 photo_819363.jpg
彼德史杜加带领下嘅多蒙特可谓脱胎换骨。 首先祝各位球迷朋友新年快乐,又到了新一期「德甲时间」喇,呢期就同大家讲下德甲劲旅多蒙特。点解要讲多蒙特?皆因佢哋近期都几多话题嘅,例如换帅喇,顺利走出泥潭喇,喺冬季转会窗搵到笋货喇,以下就让笔者为大家简单讲讲喇。

众所周知,多蒙特近年系德甲一股不可忽视嘅力量,严格嚟讲,只有佢哋一直能给予班霸拜仁慕尼黑压力。而在季初,多蒙特嘅表现可谓十分强势,佢哋前7轮联赛豪取6胜1和佳绩,一度连续好几个礼拜位列榜首,但从旧年10月份开始,多蒙特似乎中了魔咒,佢哋当时连续8轮联赛不胜兼且输足5场,表现让人大跌眼镜。相信好多人都会估到球队会有乜动作喇,就系换帅囖,新帅彼德史杜加喺旧年12月10号临危受命接过多蒙特教鞭,点知真系换帅如换刀,多蒙特随即顺利实现大反弹,喺新帅带队嘅8轮联赛当中,多蒙特未尝败绩兼且取胜5场,而且期间球队进攻端表现让人满意,多蒙特亦因此顺利返回积分榜前三甲之列。毕竟此前挖坑太深,多蒙特已经无法撼动拜仁嘅一哥地位,相信最终能获得来届欧冠入场券已经足以让拥趸收货。由于彼德史杜加带队战绩出色,多蒙特高层已经发话,希望呢位奥地利主帅留任,尽管目前仍未有确实结果,但彼德史杜加留低应该系众望所归。

对于多蒙特而言,还有好消息,就系「玻璃人」马高雷斯已经伤癒回归,平心而论,如果佢无病无痛,处于巅峰状态时绝对称得上世界级,但无奈天妒英才,频繁大伤对其意志方面肯定有影响。幸好佢今次回归之后逐渐找回状态,而且喺上轮对阵慕逊加柏时一箭定江山帮助球队全取3分,如果佢完全恢复,对于如今处于复苏之势嘅多蒙特嚟讲无疑系一大幸事。而另一位近年饱受伤病折磨嘅大将葛斯亦恢复得唔错,虽然离佢巅峰仲有一段距离,但其目前已经可以为球队作出一定贡献。总而言之,阵中主将健健康康肯定系球队高层以及球迷都希望见到嘅结果。

最后肯定要提下多蒙特喺啱啱过去嘅冬季转会窗执到宝喇,比利时前锋巴舒亚尔从车路士租借来投,坦白讲,笔者之前并唔睇好呢笔交易,但结果已经证明一切,呢位喺车仔郁郁不得志嘅射手嚟到多蒙特之后立即爆发,佢代表多蒙特踢嘅前2场联赛就斩获3球,足以让一众拥趸欣喜若狂,有见及此,多蒙特迅速表达出想正式签下佢嘅意愿,但车仔都唔傻,见到昔日食之无味弃之可惜之人有如此状态肯定唔会轻易放人,至于巴舒亚尔最终花落谁家目前仍不得而知,但眼前显然更为重要,处于复苏阶段嘅多蒙特能拥有呢位即插即用嘅杀手绝对系赚到笑。

好喇,呢期「德甲时间」就到此为止,如果对德甲感兴趣嘅球迷朋友就继续密切关注澳彩资讯喇,我哋下期再见!

论坛精华