正喺沙特阿拉伯舉行嘅意超盃，今晚上演決賽，由拿玻里同博洛尼亞爭冠。博洛尼亞4強憑互射12碼爆冷淘汰國際米蘭，踢法相當硬淨，加上終極一戰大家都會額外謹慎，避免犯錯功虧一簣，睇番兩隊近5次交鋒，4次總入球開2球或以下，首選中位數2.5球嘅入球細。（周二凌晨3時開賽）
為捧盃必謹慎
上季意甲盟主拿玻里近況麻麻，上場意超盃4強以2比0擊敗ＡＣ米蘭，叫做結束2連敗頹勢，但能否保持水準，實屬疑問。主帥干地講求攻守平衡，即使贏波，往往都係小勝，近7場比賽有6次總入球開2球或以下，加上上周五凌晨先踢完4強，匆匆再戰，球員體力負荷非常大，預料會拖慢啲節奏，以免後勁不繼。
博洛尼亞比拿玻里遲1日踢4強，休息時間更少，同樣冇本錢硬碰。呢支上屆意大利盃得主擅於穩守突擊，呢種踢法面對傳統勁旅尤其奏效，上月初聯賽就曾以2比0擊敗拿玻里，重遇手下敗將心理上有優勢，自然希望再次穩中求勝，一嘗冠軍滋味。
