英超「1哥」阿仙奴，2026年第一擊將會作客般尼茅夫。「槍手」剛完勝阿士東維拉，今場乘住個勢，對住弱旅般茅，3分應該手到拿來，不過值得留意嘅係，阿仙奴之後要對利物浦，相信球員自己識得留放，而且般茅主場防線收得好窄，阿仙奴老鼠拉龜亦未必可以大勝，2.5球入球細值得留意。
（Now 621及611周日凌晨1時30分直播）文:渡邊年
位處下游嘅般尼茅夫，上仗作客以2比2打和車路士，唔多唔少畀人錯覺，以為佢哋都係大開大合。呢個論點可以話啱咗一半，般茅今季發揮好「騎呢」，作客就鍾意同人鬥攻，相反主場則盡量收窄防線減少失波搶分，球隊喺主場9戰只失6球，係英超主場失波並列第二少球隊，僅比今場對手阿仙奴多1球，近5次主場出擊，4次開2球或以下。
般茅主場防守力可靠
不過般尼茅夫陷入不勝漩渦，近10場只得5和5負，而且球隊將帥都有被挖角嘅消息傳出，翼鋒安東尼施美安據報踢埋今場就轉會曼城，而主帥伊拉奧拿亦同車路士扯上關係，有機會頂替馬利斯卡位置，要贏阿仙奴肯定困難，最多擺鐵桶陣盡頂。
阿仙奴上輪大勝維拉4比1，表現令人驚喜，但今場對手般尼茅夫唔同維拉，雙方冇咁大仇口，唔使贏到咁盡，贏波袋足3分就夠，而且「槍手」對破密集球隊始終有一定困難，尤其布卡約沙卡近排有啲跌Watt，約基利斯又要足夠供應先識入波，今場未必有力大炒。
此外，阿仙奴作客戰術較為保守，中場球員相對較多墮後協防，令進攻效率亦稍為放緩，只求勝利不介意場面沉悶，佢哋9場英超作客只入11球失7球，預料今場入波數字唔會多，推介2.5球嘅入球細。
