亞運女足來到最後1輪分組賽，3個小組已合共有6隊提早取得直接出線8強席位，餘下焦點係邊兩隊能夠以最佳小組第3名晉級8強。E組越南女足對泰國女足成為生死戰，翻查兩隊近4次交鋒，越南女足獲得全勝，明顯食住對手，可以睇高一線揀主勝。（周一晚6時30分開賽）文:Mic少
根據賽制，亞運女足12隊分成3組，每組前2位球隊及兩支最佳小組第3名晉級8強淘汰賽，E組日本女足同中華台北女足同樣兩戰兩勝，已提早獲得出線資格。同組越南女足、泰國女足都係踢兩場輸晒，如果今仗交鋒打和，隨時「攬炒」一齊出局，雙方應該會豁出去搶攻。
睇番越南女足今屆兩戰入1球失10球，泰國女足更加冇波入，淨吞9蛋，表面上兩隊表現同樣差劣，但存在格食格情況，越女近4次對泰女，全勝之餘僅失1球，有往績支持，球員心理上佔優，來到關鍵時刻，可能成為贏波重要因素。
F組「韓戰」旺開細
另外，F組上演「韓戰」南韓女足對北韓女足，兩隊同樣兩戰兩勝，已提早獲得出線資格，但考慮到歷史原因，雙方都不敢怠慢，應會全力以赴，就算未能勝出亦最少要保住不敗。翻查兩隊過往碰頭，戰局多數陷入拉鋸，近6次對賽有5次總入球開出2球或以下，最好揀2.5球入球細。（周一下午3時開賽）
